الذي ............... بقلم الشاعر / هاني عبد الوهاب

السور علي بينا
والنفق ردموه
قطعوا الذي والتي
وابن الذين سابوه
داير ف كل السكك
يلعن أبو اللي جابوه
هذا صبح راكب
جم هؤلاء ركبوه
***
ما حد عارف لماذا
أو كيف هذا سابوه
أخد القرار حضرتو
كل اللي مات دفنوه
***
فين القتيل اندفن
سؤال وسأله أبوه
ما بقتش قادر أجاوب
تقدروا تجاوبوه
***

سكوت
مش راح نقيد النار
بين الذي والتي
الكل فينا احتار
صبح الفقير متهم
انه اشتكي جوعه
لما ولي نعمته
قرر يكون جبار
***
احسب جروحك كده
كام جرح منهم طاب
تلقي الدماء للركب
طالت جميع لبواب
أتلم شمل الأعادي
واتفرقوا الأحباب
***
واحد في قلبه الحسد
والتاني فيه طمعان
قام جه تالتهم سرق
مع انه كان شبعان
رابع ولادك صدق
لكنه شخص جبان
***
خامس ولادك عروسة
خطابها هجروها
علشان سادسهم فتوه
ازاي يحبوها
بيت المحبة صبح
مهجور وسكانه
من غلب كلهم
طفشوا وسابوها
***
هذا ما كان بيننا
أنا واللي هم أخوات
أزاي يعود شملنا
مع كل دي حسرات
ما طلبونيش بالفرح
لو كترت الدمعات
ودموع عنينا ملت
البحر والسماوات
...............
هاني عبد الوهاب