انا مصرى وجاى اناديلك
ماسح د معى بمناديلك
نادر لاغزل مواويلك
م الفرحة راح ابدر ورد
=======
انا مصرى واصلى حويط
وبعرقى راح اروى الغيط
سيبك من زيط ومعيط
والله ما زيك حد
=======
انا مصرى بغنى يا ليل
ويا عينى عليك يا زويل
ادى ثومة تقول مواويل
الله على ثومة بجد
=======
انا مصرى وابويا كذلك
كان جدى بيغزل شالك
حتى فى العصر الحالك
دبحوكى وكنا الضد
=======
انا مصرى يا بوى على طول
راح اشيلك عرض وطول
وهاغنى على الارغول
فرحتى فى اليوم والغد
=======
انا مصرى وزهرة جيلك
لو تهمسى زحف هاجيلك
قرانك او انجبلك
الله ع الوحدة بجد
=======
انا مصرى وعيدك عيدى
زارع عشقك فى وريدى
بحراوى كمان وصعيدى
ف ميدانك طرح الورد
=======
انا مصرى وزيى ما فيش
هاكل جبنة وقراقيش
ع الدقة ان ممكن اعيش
ولا يملك امرك حد
=======
انا مصرى بغنى السيكة
لا ملاوع ولا بولاتيكا
غصبن عن عين امريكا
راح اعدى واخطى السد
=======
انا مصرى ومش مغرور
دايما ع الظلم هاثور
علشانك هطوى بحور
فيه اكترمن كدة ود ؟
=======
انا مصرى وابوى ربانى
وفصيلتى كدة ربانى
الصعب اهرسه بسنانى
واسالوا يا اخوانا السد
=======
انا مصرى وليا تاريخ
ولا زيينا فى المريخ
شوفتوا حيط الصواريخ
ف اكتوبر ما لهاش حد
=======
انا مصرى وعمرى ما اخاف
فى الخير تلاقينى شفاف
فى الشدة بكون سياف
اياك تغلط فى العد
=======
انا مصرى الثورة ف دمى
قالهالى خالى وعمى
طول عمرى اقرقش همى
واطلع من همى اسد
=======
انا مصرى وماشى بكيفى
واد مجدع بكرم ضيفى
فى العوزة رافع سيفى
وبصارع زى الفهد
=======
انا مصرى ومش للبيع
وطنيتى سد منيع
عمرى ما هقول تطبيع
مهما انا عمرى امتد
=======
انا مصرى ورافع راسى
على شطك مركبى راسى
وادى ارضك تحضن فاسى
عشقاها الساقية بجد
=======
انا مصرى وطينك حنة
وسنابل ولا فى الجنة
مهما الشيطان فرقنا
هنصللى ونقرا الورد
هنصللى ونقرا الورد
.....................
ناصر على توفيق