لسة فاكرة ...بقلم الشاعر / مصطفى تيسير

إنتي لسه فاكرة شكلي ؟

لسه شايله صورتي عندك ؟

و لا نسياني بمشاكلي ... 

دا أنا الواد إلي كان ساكن ..

في أول شارع الثورة ..

و مستنى النهار يطلع ..

و لسه لحد دلوقتي ..

بيستناكي ع المطلع ..

و بنده و إنتي ماترديش ..

يا بلدي ليه م تسمعنيش ؟

دا أنا العرقان و أجري مفيش ..

** *** *** **

أنا العاشق تراب أرضك ..

بصلى ع الطريق فرضك ..

و بدعيلك يصون عرضك ..

أنا الواد إلي كان يحلم ..

معاكي يكسر القضبان ..

و نرجع تاني زي زمان ..

أنا و إنتي نعيش في أمان ..

** *** *** **

أنا الواد إللي كان نفسه ..

يعيش مستور ..

و عاش مكسور ..

أنا المقهور ..

أنا الواقف في كل طابور ..

طابور العيش ..

طابور الجيش ..

أنا الواد إللي عاش طلطيش ..

و بحتاجلك ألاقي مفيش ..

و لا عمري أخدت فلوس ..

عشان أضرب !!!!

عشان أهرب !!!

أنا العطشان و نفسي أشرب ..

أنا أملي أجيكي و أبوس ..

و أبارك ثورتك يا أمه ..

علي عداكي أتف ... أدوس ..

دا أنا المنحوس !!!!

أنا المفروس ...

أنا المسلم و أنا القبطي ..

أنا بحار في مركبتك ..

و سبتيني و لا سبتك ..

و جيتي تهربي مني ...

و أنا جبتك ..

أنا الواد إللي شال خيبتك ..

يا مركب فيها بحارة ..

سابوا شراعها و الطارة ..

و توهنا فيكي يا خسارة ..

أنا الواد إلي كان نفسه ..

يرصف شارع الثورة ..

عشان يمشي م يتكعبلش ..

حولت أرصف ...

لقيت فيكي الطريق ماكملش ..

و لسه لحد دلقوتي ..

كاتم صوتي م بتكلمش ..

يا نور عيني حبيتي يا مصر ..

.............................

بقلم .. مصطفي تيسير ..