طب مش يجوز
إن العجوز قلبه شباب
واللا عشان ماهو شعرهُ شاب
ممنوع يحب
إيه يعني لما السنّتين ...إتخلّعوا
والشفّتين بقوا دبلانين
ولا ينفعوا
غير ف الكلام
واللا عشان وحش السنين
شق الطرق تحت العينين !!
مش شايفه ليه ؟
إن الخطوط تشبه وشم
يعني إتوشم
زي الشباب ما بيعملوا
ع الأدرعة
وعلى صدرهم بس بغشم
مستكترة...
إن السفينة تجاوزت سن المائة !!
ومستغربة...
إني بجدّف بالعصا
ف زمن البخار !!
ظنّك غلط
إفتكري بس إن النبي
نوح كان عدّى ألف
من السنين
ما آمنشي بيه إلا...نفر
ما تحبينيش
ده شئ يخصّك بالأكيد
وكمان أكيد إنه غفر
وإنتي برزالة محرّمة
إني أحب !!
مع إن ده ....مش مستحيل
طول ما السفينة مشرّقة
عضم الرئة ...ممكن يحس .
...........................
محمد البنا