إبن الهموم مهموم
لو حتى عاش فى قصور
أصله إتولد بالهم
فبقى الألم محفور
البسمة كدبة خد
والدمعة مسجونة
والأهه صرخة وجد
سكينة مسنونة
طول ما الوجع شريان
فرح الحزين مبتور
قالوا زمان فى المثل
فرح الحزين سجًان
واللى مناه الفرح
على طول يعيش حزنان
الفرح للمرتاح
مش للى قلبه جراح
واللى رضعها مرار
لو نصبوه سلطان
بردو يبان مكسور
ما هى أصلها علة
فى النفس مغروسة
طرح الوجع أوجاع
والفرحة مدسوسة
والساقية مهما تدور
ما تغير المبدور
واللى اتبدر أشواك
إذاى هيحصد نور؟
القسمة متقسمة
والحكمة معروفة
الجنة للصابرين
واضحة ومكشوفة
إرضى تنول الرضا
الرزق فوق فى السما
والفرح مش فى الجاه
الفرح وسع قبور
..............
محمود وحيد