إيه كان يحصل ....بقلم الشاعر / مصطفى تيسير

طب إيه كان يحصل يعني ..


لو عشنا الماضي ف بكرة ..


و اليوم عشناه الأمس ..


لو كان اليوم يتشقلب ..


و ف ليلنا نشوف الشمس ...

لو إن حواسي الخمس ..

بقوا سته و تسعه و عشرة ..

لو إن خبر ف النشرة ..

بيقول الحال اتغير ..

و كبيرنا هيبقي صغير ..

و الدنيا إتقلبت عكس ..

و القطر خلاص بقي تاكس ..

و النيل من بكرة يروح ..

لحظة ما أضرب له كلاكس ..

و العالم بقي لغه واحدة ..

و اللغة بإشارة فاكس ..

سمعت في ناس بيقول ..

صرح مصدر مسؤول ..

بإن الكون من بكرة ..

هـ يصيبه كسل و خمول ..

و الناس فرحانة بترقص ..

بتقول هو إحنا نطول ..

و إن إحنا ف كون بيدور ..

و الأرض كمان بتدور ..

بين ودن و قرنين طور ..

في جريدة بكرة الصادرة ..

بتاريخ إبريل الماضي ..

قريت ف السطر الفاضي ..

إن شعوبنا العربية ..

إخترعت قال طيارة ..

تقدر توصل للنمله ..

لو دبت يوم ف الحارة ..

و البحث العلمي إتقدم ..

و الفيل إتجوز فارة ..

و السد العالي بتعنا ..

شغلناه خلاص بحجارة ..

و الجيش العربي إتطور ..

قاعد مستني إشارة ..

و هيقطع راس أمريكا ..

و هيعمل مليون غارة ..

و البحر الأحمر قرر ..

هيعبي الموج ف شكارة ..

إعذرني يا صاحبي بهيس ..

أنا ضارب لسه سجارة ..

..........................


بقلم ... مصطفي تيسير