الله أكبر
في عين كل من شافك
ولاصلى
ولاسمى باسم الله
عيون تشبه
كمال الروح
وبسمة من خيال مدبوح
وشوق العمر
نحلم بيه
نكتب شعر لجل رضاه
نتمناه
يكون دايما مغازلنا
عيون تشبه
سمار الليل
في لون الشمس وقت غروب
وكسوة الضلام جاية تغطيها
مغطيها الإله بالحسن
وأجمل سكة وياكي
بنتمشى بنور العشق
وجواكي بشوف النور
منور كل أجزائي
بدوب من لمسة من إيدك
بغير من دم شريانك
وشريانك كيان عالي
وأنا مالي
مادمت الضحكة ف عيونك
مادمت الساكنة ف النني
وده اكمني
بلاقيكي
ضيا بصري
ونضارة بتحميني
نيران الحب من غيرك
وأنا غيرك ماليش لزمة
متين أزمة
وميت موتة
ياست الحسن
يابوصلة شعاع روحي
أنا ليكي
أنا بيكي
أنا كلي حكاويكي
أنا الغنوة في أفراحك
أنا بكره
فضميني
وضميني
وارمي على الملا عشقك
أناحقي أكون ليكي
ياست الحسن
الله أكبر
في عين كل من شافك
ولاصلى
ولاسمى باسم الله
في عين كل اللي حاسدينك
وعايزينك كده شاردة
مافيش فايدة
بأمر الله هكون ليكي
................
عبدالتواب الرفاعي