ما تسيبنيش...بقلم الشاعر الكبير / جابر الشوربجي

إوعى تقولي: كمان إسبوع
ترحل تاني؟
مافينا رجوع
ياللا تعالى
نور دربي
فرح قلبي
قيد قناديلك
إيدي ف إيدك
قيد ما تخافشي
و إياك تمشي
قيدلي شموعك
و تزودلي عليها شموع
واوعى تسيبني أموت مخدوع

قيدلي صوابعك
احكي انا سامعك
وادخل ياللا في الموضوع
لاحسن قلبي خلاص موجوع

انهي صيامك
فك لجامك
وشوش ، إهمس
تمتم ، برطم ...
زعق ، اصرخ
نط اتشقلب
صبح ومغرب
واوعاك تقلب
خلّي ورودك
توفي وعودك
نفسي كلامك
يجي مسموع
إوعى تجيبلي كلام موجوع

دانا من حيرتي
وميلة بختي
صرت أهاتي
وأضرب خمسة
في ستة يوماتي
وأرجع تاني
أعيد م الأول
و اللي انا شوفته
يا ناس عمنول
جه ولا طوّل
شوفته امبارح
كان فين رايح؟
هم و وحدة و قلة حيلة
يادي النيلة
هو الهم لازقلي بغيرة؟
و لا الوحدة ؟
شابطة و قاعدة
حد يقولي ......
دانا مش عايز غيرك إنت
تقعد جنبي
تملا عليا
نني و قلبي
تبعد عني همّي وغلبي
تطرد بره
عيشتي المرّة
تبقى العين اللي باشوف بيها
إمسك إيدي ... كمان حنّيها
دانت منايا
وكل هنايا
شوف جوايا؟؟
صابه خضوع
مهما بعدت
و روحت هاجرت
زاد ممنوع
أكلي وشربي
و كل حياتي
إنت يا حبي
أفضل جنبك
وأملا بسحرك
روحي وعيني
أصل كياني ليك متبوع

.......................

 جابر الشوربجي