مانيش لاقى ولا كلمة
تكون ماشية على الموضة
معاها علبة الماكياج فى شنطتها
وليها طموح...
وعاوزه تروح تقدم نفسها ليا
أعينها قصيدة شعر
فى ديوان الأنا والروح
شروطى للوظيفة كتير
تكون الكلمة من عيلة وبنت اصول
معاها بالقليل خالص ليسانس آداب
وتبقى حسنة المظهر
ومعناها يكون كداب
يكون الطول
على بحر الهوى الشاعر
ويبقى الوزن مش زايد عن المعقول
وتفهم فى كلام الناس
وتتعامل مع الباشا مع الكناس
تكون كلمة وليها أساس
تشيل هم الحروف اليتم والكراس
رحيمة عندها إحساس
ورحمتها ف قول الحق
تعرف امتى تصبح آه
وتعرف امتى تصبح لأ
ولا تهتم بالتشكيل
تخللى الليل مهوش نايم على بعضه
تجيب الصبح بالأحلام
تحط الفكرة ع الفكرة وتعمل كوم أمل
يقدر يجيب الحب من قدام
تقرب دعوة المظلوم
وتتقدم إلى باب السما تفتح
بدعوة وركعتين لله
تكون يسقط ....تكون يحيا....تكون صاحية
على باب الوطن واقفة بتحرس سيرة الشهداء
معاها حجة التضاريس
ووياها عقود ملكية الأهرام ونهر النيل
تكون الايه فى المصحف
وتفسيرها من الإنجيل
ويفهمها بتوع العلم من نظرة
ومن بسمة يفوق العبط والمهابيل
معاها دليل ومن آدم
بإنها واحدة م الأسماء
ابوها كان حديث قدسى
وليها بآية الكرسى نسب وولاء
تكون نادرة تكون قادرة تكون عدرا
تخلف للقيامة مسيح
صوابعها تكون مدهونه بالتسابيح
عشان ساعة أوان الجد
بإيديها تقيم الحد على شبيحة الأفكار
وتقطع إيد لصوص الفجربالمنشار
وتعلن ع الملأ بكره يا خلق عشار
على سنة كتاب الثورة والميادين
وإن الضحكة كروية
وإن القدس عربية
وإن الصبر مش مفروض
على اللى دراعة ملوية
بإيد شياطين
.....
حمدي موسى