ولسه الدنيا بتقاوح
وخارجة عن حدود النص
وبتدعبس
على فكرة وأخواتها
على نبضة وآناتها
وغايصة جوه دم القلب
وتتمرجح وتتطوح
مابين أمسى وبين بكره
وأشوف الذكرى
بتشكشك جناب الحلم
بدبوس الأمل مرة
ودبوس الألم مرات
وبتدور على ماضى
ومتسلسل بكل قساوة الأيام
رفض يرجع ولو مرة
يحليلى الحياة مُرة
يرجعلى حبيب قد كان
واحشنى كل حاجة زمان
ساعة ما القلب يتمطع
وعينى من الهوى تلمع
وأفرد حلمى عالنجمة
ويتسامر مع سحابة
ينور عتمة الضلمة
تحقق كل أحلامه
ويرجع تانى لكتابه
يقلب تانى صفحاته
تشوفها كل قسماته
ويكتبها فى وِرد عظيم
وبتغرغر حروف اسمك
وبستنشق هوى قلبك
فتتغير خرايط الحب
ويرحل عنترة وروميو
ولا عبلة ولا جوليت
ولا ليلى ومجنونها
أنا فى حالة إنعدام الوزن
أنا فى حالة هروب القافية للأسهل
لا أنا جُبران ولا الأخطل
عشان أرسم حدود حسنك
تكون خارجة عن المألوف
أنا المخطوف فى سحر عنيك
من ساعة ما كان الحب يتهجى
جمال خصرك
قوافى النظم تتحدى هواجس خوف
وتتخطى حدود قصرك
فتتمخطر حروف اسمك
مع الفاعل مع المفعول
وتنطقها الحروف ضمة
وتقراها العقول فتحة
وتسكنها القلوب كسرة
كأن حورية ساكناها
حتى حروفى أهى بتخجل
وعايشه فى حيرة وبتسأل
ما قلت لكم من الأول
حروفى عايشه برضاها
.......................................
وباعرف كل يوم واحدة
عشان تشفينى من حبك
مافيش ولا جارية يا أميرتى
بتتعدى حدود قلبى
وتجعلنى كما الدرويش
ما هو أنتى المأوى
وأنتى الزاد
وأنتى حدودى راسمة بلاد
وأنتى الميه وأنتى العيش
وكله مافيش
عشان متوضى من مدة
ولسه وضوئى ما نقضشى
عشان دمعك على خدى
ده طهرلى الحواس الخمس
ولا سابشى
بدن ولا روح
خلانى بقيت شفاف
وراضى بِكسرة ومن حُبك
وراضى بقُبلة ومن فَمك
تيممنى وأنا يمك
تعيشنى بحد كفاف
بشوف كل النسا فيكى
عشان مأويا فى عنيكى
وفى إيديكى براح الكون
ولا عارف لمعنى اللهفة من غيرك
ولا شهقة ولا زفرة
ولا دهشة ولا صرخة
من الفرحة
ولا معنى لحضن طويل
ولا سهرة بطول الليل
ولا دمعة فراق تحرق
ولا شوقى فى لقا يسبق
ولا حتى قصايد الشعر
ولا حتى عمايل السحر
ولا كلمة بمعنى الحب
ولا دعوة ولا استغفار
بيمحى الذنب
ولا حتى حدود الكون
ولا يابس ولا ميه
ولا حتى خطوط الطول
ولا معنى لخطوط العرض
ولا حتى السما والأرض
يجيبوا معنى لقصيدتى
ولا حتى بحور الشعر
تساوى نظرة يا حبيبتى
.........................
شعر / ماهر أبوالمعاطى