مليت من الموت البطئ
مبقيتش أطيق
العيشة فى القفص الحديد
باصرخ برئ
والمحكمة اللى اتشكلت
من كل احلامى الجليلة والضمير
طلبت من الشاهد انا
انى اقول اللى اعرفه بحق وحقيق
ياسيادة القاضى
هذا اللى ساكن جتتى
ذنبه الوحيد انه بيحلم بالسكن
أوضه وحصير
والباب يخبط يبقى خير
ويكون معاه كام ابتسامة للزمن
وقصيدة من شعر الأمير
وساعتها مش فارقه الحياة
لو عاش ضرير
كان نفسه موته تريحة
من غير ما واحد يجرحه
لكن الحقيقة سيدى
انه أنا هذا الهو
قد مات كتير
..............
حمدي موسى