سكوت خالص
................وصوت تكييف
وضوء خافت
.................قلم كييف لكن عايق
ومش طايق يشوف الحرف متضايق
......................................فابيهدّيه
وبيطبطب قوى ع المعنى ويوضيه
وبيرص القصيدة صفوف
حروف موصولة بالقبلة
إمام الشعر بيكبر ويستفتح
ويتلو سورة الشعراء
فاينتابنى أنا....... إغماء
فاروح عالم من الأشواق
ألاقى حبيبتى طوّافة
مناسك حبى بتأديه
فانسعى بين أمل ورجاء
وانام على حجرها ساعة
تروح الروح
فايجى الحلم برسول الهوى مفضوح
افوق على صمتها الهيمان
لكن لسه مابين الغفوة والصحيان
ونتكلم ونوصل آخر الكلمات
فانستسلم لحضن الهمس
ونسلم شعورنا الخمس
.................................للنظرات
ونتراجع لخط الحلم
نصنع كون على كيفنا
هواه بارد ومش وارد
لا شبه جزيرة ولا قارة
هوا عمره مابات بره
ولا راجع معاه ميكروب
ربيع صافى على كيفك على كيفى
لاهو شتوى ولا صيفى
بدون فكرة شروق وغروب
حبيبتى حل اشواقنا
نعيش الدنيا بالمقلوب
...............
حمدي موسى