وبيقولوا ان انا عصبى
انا عصبى
طب اعمل ايه ف أعصابى
أجيب مين يعنى يستحمل غبائى
إلا أحبابى
وليه عصبى
قولولى حاجه ماتعصبش
عاوز بس شئ واحد يكون مظبوط
ياناس دا احنا بنبقى الضهر فى أغسطس
وناس بارده ما بتحسش
وناس ملهاش ف هذى الدنيا أى شروط
وآهى عايشة وبتخلف وبتجيب للحياة
نقطة
يادوبك جوز رجول مع صوت
وبنى آدم وبس خلاص
بيعمل ايه ولا حاجه
حطب وخلاص
يساعد بس ع الولعة
وتحتاجة ساعة ماتعوز
حاجة دلعة
شوية رمل نعرف بيهم الصحرا
وحبة حشد تفرح بيهم السحرة
ويوم العيد
يآمن السحرة واخواننا ولا حاسين
شوية طين
يادوبك بس يتولع عشان فرعون
وجند هامان
بتوع ياريت ولو ممكن
يكون لينا كحظ قارون
انا مجنون ؟
انا مجنون
لكن نفسى أكون مثلا ف عصر هارون
سحابة تروح منين ماتروح يكلمها
يهددها يحدد زرعها فيها
وياخد حقه من عينها
يحج ف عام ويغزو ف عام
ويسمع شعر وموسيقى
ويحكم حتى ع الأحلام
فانا عصبى
عشان مش عاوز اموت ببلاش
يادوبك بس جاى عريان
وراجع حيلتى متر قماش
بقى بالذمه دا اسمه كلام ؟
بلاها نادية خد سوسو
ونرمى الزهر زى ما يجى قسمتنا
انا بقرص
ومش ممكن اعيش مقروص
ولو دخل الشيطان فيا
مانيش ملبوس
وهاتعصب
والله الغنى عنكم
ومش عاوز ولا حسبى ولا نسبى
ولا عاوز حلاوة ماسخة من قصبى
مادام خايب ملاه السوس
وانا عصبى
............
حمدي موسى