ماكانتش همزة وصل ولارابط
كانت جنينة ورد نجرى نشمها
إستجرى مين من بعدها
فك الحروف من بعضها
خلانا نتشابط
أقرب مزاد
رحناه نبيع فيه الضمير
والسر فوق منه ردمنا البير
والقول بيتناسل ويبقى كتير
الورد جف خلاص
لاعاد له لون ولا ريحه ليه بتفوح
الله يسامح صاحبته
ركبت سفينة نوح
بقى كل واحد يوهم التانى
بإنه صار من فعلته مدبوح
ويزيح بعيد عنه الطريق
ريقى نشف م القول يامين يدينى ريق
أنا اللى ياما شربت من بحرين عسل
ماطلعش م الأصلى
أصبحت جوه المدرسه
ماعارفش فين فصلى
والكل بقوا (أساتيذ)
مع إنى لاانا فاشل
ولا أخيب التلاميذ
الله يسامح صاحبة البستان
راحت وراح من بعدها العنوان
سابت لنا الأبيض مع الأسود
ماسابتش ليه ألوان
ولا حتى سابت للأمور ضابط
جايز عشان
ماكانتش همزة وصل ولا رابط .
...........
علي جامع