فى بلادى ..!!
كل حاجة بتمشى عادى ..!!
يعنى ممكن
فجأة تضحك وأنت شايط
او يجيك الدور وتلطم
وانت هادى ..!!
يعنى تفقد إتزانك
والديون تقلب ميزانك
والهموم تاخدك ورادى ..!!
فجأة تخرج عن شعورك
وللا تشخط ف اللى جنبك
إمشى من وشى السعادى..!!
او تقوم بينكم خناقة
كل واحد عنده طاقة
تبقى دم ... وكله عادى ..!!
يعنى ممكن ف الروشتة
تلقى عبد العاطى كفتة
والحلول مابقتش ورطة
كله فتى وهرى فاضى ..!!
يعنى ممكن
تدى صوتك للى باعك
واللى عاش يلوى ف دراعك
حتى لو بينكم قواضى ..!!
يعنى لو شتت شوية
تصحى تلقى إسكندرية
غرقوها ف شبر ميه
والمسيرى ماكنش فاضى ..!!
فجأة بيعلوا الدولار
فجأة بيرقوا الحمار
ماللى قبله كان حمار
بس هتصيب النوبادى ..!!
يعنى سعر الحاجة يغلا
والضرايب برضه تعلا
ويقولولنا استنوا نقلة
فيه علاوة لكل قاضى ..!!
يعنى ممكن
اى حاجة ف اى حاجة
واحنا من عنق الزجاجة
للزجاجة ..!!
دنيا ماشية بالتراضى ..!!
والتراضى بس بينهم
دول كبار الله يعينهم
حتى لو قربت منهم
لسه برضه السجن فاضى ..!!
يعنى هما ياخدوا كومهم
واحنا مش ممكن نلومهم
طاب وليه نقلق منامهم
وإحنا كنا .. فعل ماضى ..!!
فى بلادى ..!!
......
سعيد شكري