العلم نور ...... بقلم الشاعر الكبير / السيد جلال

مهداة للأستاذة Awatef Elderene
 
 
ــــــــــــــــــــــــ

على جسم الصخر
كتب التاريخ حكايات
عن أوزوريس
ورجال رمسيس
ونفرتات
عن أمجادهم
تحكى معابد ومسلات
والأهرام واقفة هناك
بتقول: العلم نور
وأدينى معاكوا بطوف
وبشوف واتعلم
من ماضي رحل
وصخور خرسا بتتكلم
عن جهد جدود
وتاريخ ممدود نتعلم
دا الصخر معاني
وأمانى تحس وتتألم
دا العلم نور....
ليه ع السكة ماشي تغازل
مايل تدّلع
سايب كتبك فى مهازل
ومنازل تتقطع
والعمر يعدّى ايام وسنين
وانت تضيّع
ليه تبقى فى النازل
فكر تطلع
دا العلم نور....
فيرد العم مخالف ويقول لي :
قول لي يا خويا
حيلتك آيه تتكلم عنه؟
علمك فارغ
لا بيشفع ولا ينفع طنّه
طن الورق الفاضي أحسن منّه
ولحقنى صاحبي سعيد
بالرد وقال له:
من غير العلم هـ تركب آيه؟
وتطيب ازاى من مرضك؟
وتنام على آيه؟
تلبس آيه... يووووه يا معلّم
بعد دا كله وجايلك عين تتكلم
دا العلم نور....
يغضب منه أوام عمي مخالف ويبلّم....
ويكشر كدا وبعلو الصوت يتكلم
ويقول له:
تفتكر الصبي عندى بياخد كام
ملاليم زبك
ولا اكياس أوهام
ولا بيعمل بالعلم فريك بحمام...؟
يعنى معاك بتساوي...والسلام
مش تقول لى العلم نور...
العلم نور.....
يزعل منه عمى سعيد
ويقول لى: لساه نايم نعسان
جوّه القبر
تايه فـ التيه بعد السور
زى الضلمة فـ قاع البحر
ليه ما يكونش زى نباتة
فـ رمل الأرض
عايشة تدور على خيط النور
اسمع منى يا عم مخالف
واتعلم من عم مهاود
جرب تانى وعاود
جدد أحلامك
كتب العلم أمانة بتستناك
فـ المكتبة تبكي وتشكى وتترجاك
بدل الطاولة فـ قهوة
جرّب خد وياك
صحبة أخيار وكتاب
ومناقشة بفايدة
هترضي هواك
دا العلم نور
يا اولاد بلدي
يالله وبلاش لمة
ورونا الهمة يا رجالة
من جوزة لعوزة
هدم دي بطالة
رجع جمع أمجادك
وازرع فكرة منطالة
دا العلم نور.......
الله ع العلم يا ناس
ألوان وعلوم وفنون
ورجال تنباس
وعلما وخبرا فـ كل مجال
بتحقق أعاجيب وخيال
طيران ونجاح
وشموع أفراح
ولا أرض تعاني فـ إيد فلاح
يا اولاد النيل والشمس
ياله نعلم فـ المتبلم ونصحيّه
ياله نشيل الغمّة ونفتّح له عينيه
ولا يوم يصبح ناسي
ولا من جهله يشوف ويقاسي
دا العلم نور
العلم نور.........
ــــــــــــــــــــــــــــــ
السيد جلال
الجرايدة/كفر الشيخ/1990