أيوه بحبك ياوطن رغم الظروف
رغم اني جواك ياوطن حاسس بخوف
والقلب م الأحزان صرخ
ولكني غيرك ياوطن صعب اني اشوف....
وسافرت ييجي ميت بلد...
وكتبت بإديا الحروف
وهجرت اهلي والولد......
ورضيت بذلي في الصفوف
علشان انول لقمه ذبد.....
فالقتني مرمي ع الرفوف
ياخساره العمر اللى فات ياغربتي
ياخساره الحلم اللى مات على شنطتي
مابقتش عارف وجهتي
وسنين بدور ع النهايه لقصتي
من ناحيتي
مش لاقي ضى ف دنيتي
ماشى ف طريقي وسكتي
وحايلت فيك علشان تعدى محنتي
وما نابني منك ياوطن
غير الاهانة والكفوف....
وكانى مش ابن البلد
وﻻ بتعاملني كاالضيوف...
بتشوفنى بس ف مستند
بالنسبه ليك حبه ورق من بين ألووف....
انا العامل انا المسكين انا الشقيان
انا الشايل على كتفي همومك شيل
فرضت عليا ليه الحرمان
برغم الحب ياوطني سايبني عليل
وصبح وليل...وضلمه ونور
باشوفنى غريق في وسط بحور
ومستنى حياتي تدور
واقول يمكن يكون مسطور
واكيد هايبان
والاقي حنان
الاقي امان
اعيش جوه الوطن انسان
وجايز يبقى ليه مكان...
وحلمي اعيش بقيت عمرى مش مأجور...
افتح دراعك ضمني مابقتش قادر ع البعاد
انا من ولادك هاتلاقيني
ان قلت حي علي الجهاد
انا برضه ابنك ياوطن
ماتخلينيش سلعه ف مزاد
مادد جوازي للبلاد
مختوم ببصامه عناد
مليان وجع من غربتي...
خليك ياوطني غيتي
وﻻ تسقي عرقى للعباد...
خليني ليك واحفظني من علو الجروف
امسك اديا وشدنى احسن ما ألوف
على حد غيرك وانتهي
فا ياريت تشوفني يا وطن
من غير كسوووف
.............
موسى كامل موسى