لما اتخاصمنا من يومين
علشان باحبك قلتها بين كلمتين
وانتى حبيبتى بتعشقيها لوحدها
عاوزاها خالصة بين قوسين
عاوزانى اسكت بعدها
واحط شرطة ونقطتين
زى ماتكونى حبيبتى خايفة لاالكلمة ومعناها العلى
يلقوا مصير سيدنا الحسين
عاوزانى اقولها لوحدها واللى هايجى بعدها
كلمة باحبك مرتين
علشان باحبك قلتها بين كلمتين
غضب عليا كل شئ
يعنى الحروف عملت تجمع واعتصام
حتى المعانى جالها حالة م التشاؤم والفصام
مش عاوز اقولك شهر رمضان اللى جاى
أعلن بأنه مش صيام
والليل رفض يقبل نهار
والزرع وشه اسوذّ مش قابل خضار
والنيل هرب من بين حنان الضفتين
لما اتخاصمنا من يومين
بصيت لنفسى ف المرايا
لقيتنى فيها ضعيف قوى
ومخيف قوى وخفيف قوى
حتى المرايا نفسها من شكها
بصتلى بصة باحتقار
واديتنى فجأة ضهرها
حطت ايديها ف وسطها وقالتلى غور
زعلتها؟
ايه اللى جاب باقى الكلام
علشان يخش ف حبها
طب كنت فكر حبتين
لما اتخاصمنا من يومين
رفض شارعنا ادخله
وف جامع الحى الكبير
ذاعوا اسمى واعلنوه فى الميكرفون
قالوا انى شبه ميت
ومعاشى فيا لا أمل ولا يحزنون
حبل الغسيل رفض القميص والبنطلون
ولاحد كان زعلان ولا واحد حزين
لما اتخاصمنا من يومين
ارصاد بلدنا اتلخبطت
قال الخبير جو النهارده حر برد
ولا له علاقة بخط طول
ولا خط عرض
حتى الربيع اللى ابتدا يوم الخصام
حلف يمين انه ما جايب أى ورد
قالت وكالة اسوشيتد يبدو فيه تغيير حصل
والأمين العام بيدعو لمؤتمر
انه بناء ع اللى كان
هايغيب عن الكون القمر
فلابد يبقى فيه حذر
الكون صبح من غير عنين
لما اتخاصمنا من يومين
علشان باحبك قلتها بين كلمتين
وانتى حبيبتى بتعشقيها لوحدها
حسيت كأن عليا دين
وان البيبان بيخبطوا
فصرخت يا......انتى فين
انا كنت عايش يا حبيبتى
عشان عيونك سدادين
وحصانى عارف مربطه
بزيادة يا حبيبتى اليومين
كل الخيوط اتلخبطوا
عمال اطبطب ع المشاعر
والحواس بيعيطوا
دول يسكتوا الاقى دول بيعيطوا
دول يسكتوا الاقى دول بيعيطوا
والله لو اطول البعاد
والله يا .......... لاسخطوا
واعلقوا على باب حنانك م الإيدين
لما اتخاصمنا من يومين
معرفشى يومها كنت فين
ولا روحت فين ولاجيت منين
ولا كنت عارف فين شمالى م اليمين
فا متزعليش حقك عليا يا حبيبتى
مش هقول ولا كلمه تانى بعدها
هيه باحبك بس لكن مرتين
................
حمدي موسى