لعلك بخير.....قصيدة للشاعر / محمد على

لعلََّك بخير
وكل الوعود اللى فِضلِت مابينّا
برغم انشغالنَا
ورغم انكسار الكلام اللى ساكِت
وخوفنا اللى ساكن فِ قلب المصير
لعلَّك بخير
وكل الأماكن بتحلم تزورنا
وتسكن شعورنا
كما حُب غالى
تنادى عليّا فلا قلبى دّق
وتصرخ سنينى فِ حُزن الساعات
فلا يوم قابلتِك
ولا قُلت لأ
ولا شوفت غير الوعود الكتير
لعلَّك بخير
وكل الأمانى بتحلم تجيلِك
وكل الأغانى بلحنَك تغنّى
فلا قُرب منّى
كتب لى السعاده
ولا بُعد عنّى يريّح زياده
ياشوق السنين اللى ماليه الدروب
عشانِك بادوب
وباحلم بحلم اللّقى غصب عنّى
وباشتاق لقربَّك
وباخلَف فِ ظنّى
ولا هُنتى مرّه
ولا شوفتى زييّى بقلبى الكبير
لعلَّك بخير
لعلَّك بخير