صـــــــــــــــــراع .......... بقلم الشاعر المتميز / علي جامع

قلبى الشهيد ..

اللى انهزم على جبهة الحلم الوحيد
واللى اندفن
مابين تلال الحزن والحسن العنيد
بالرغم من انه انظلم
لساه بيصرخ بالأمل قبل الألم
وانتى الأمل
أملى اللى بيه حتى ان خسرت المعركه
هافضل بطل
أموت وأحيا من جديد
وبحبى كله أضربك
واستنى منك ضربتك
برصاص عنيكى أو بفتنة ضحكتك
وانتى تخافى من شباكى تطوقك
أو من بحور شعرى تفيض وتغرقك
متقربيش .. ولاتضربيش
تتهربى
وماتهربيش
أرجع بشوقى أقربك
أرجع بحبى أضربك
والمعركه بيننا تطول
يجوز بأنك تكسبى
وقلبى
جايز يكسبك
لكن ساعتها مكسبى
رح يبقى شئ من مكسبك .
..............
علي جامع