الود ودى
حتى السيجارة منفسه
كل حاجه واقفة ضدى
عد الجمايل يا ألم
يا دنيا عدى
قرب يا موت ما تشد حيلك يا جدع
اتزوقى ياروح ليوم المنتهى
لمى هدومك واستعدى
مالك كده متشعبطة ف حبال وجع
دا الود ودى أريحك...الود ودى
.............
كراكيب
حبة حاجات متكومة على بعضها
كراكيب جدع
رعب وقلق ..خوف من مفيش
صبر وعجل
وأمل طويل ما بينتهيش
صدق ودجل
معرفشى ليه نى الزمن ما بيستويش
وحاجات كتير متلخبطة
مرمطتى قلبى مرمطه !!
فاكراها كلمة صغنططة
انك تقولى انى أنا ما بحبكيش
الله يسامحك
يظهر حبيبتى ما تعرفيش
انى أنا مت ف هواكى وانتحرت
عشان اعيش
................................
رايح اموت
علشان باحبك هاختفى
بس اعرفى
انى أنا رايح اموت
بهديكى عمرى اللى ماجاش
أصل الحكاية ما بدهاش
انا مش ذهبت مغاضبا وماليش شروط
لكن عشان انتى تكونى ف الحياة
لازم انا تبقى حياتى ف بطن حوت
..................................................
ارتباك
يامشتتانى ف الوشوش
يام العيون ما بيختشوش
اشوف خيالك من بعيد
اروح اقابلك مالقيهوش
ضاع الشبة والصورة صبحت كلها
حبة رتوش
قلبى وقلبك مجرمين لاتنين وحوش
انا باعشقك وماليش ف حبك اختيار
يا مدوخانى فى لانتظار
لو ناوية تيجى ابعتى
علشان اقابل ضحكتك وافرش خضار
لكن قوليلى والنبى
انتى هتيجى فاردة شعرك
ولا جاية بالخمار
..............
حمدي موسى