ومين فينا ماداقشي الجوع
وجف الحلق ولسانه !!!
ومين فينا ماشافشي الخوف
وشاف الغربه عنوانه !!!
ظلمنا روحنا بالساهل
ف حزن وهم ع الفاضي !!!
بنضحك حتى للجاهل
ونبكي دم ع الماضي !!!
كتبنا الخوف ف دستورنا
قانون الفرض والواجب !!!
ف فيلم الثوره كان ثورنا
بينطح حتى ف الكاتب !!!!
مصيبه الموت لكن عاده
بنحلم بالخلود لينا !!!
بنشرب ف المرار ساده
وندفن روحنا بأدينا .....
ومين فينا ماشافشي الهم
ف رحلة عمره لو ساعه ؟
ومين فينا ماقالشي يا عم
ف توب الحاجه والطاعه ؟
كتبنا نهايه بدموعنا
على بكرا اللى مات فينا .
كرهنا الصبر ورضيينا
يموت الحلم ف عنينا !
دخلنا الدنيا بالدمعه
وروحنا بروحنا للأخر !
برغم الصبر مليينا
ورغم العجز بنعافر !
دروس السيره بالمجان
عشان القصه مفهومه
قرأنا الدرس ف العنوان
" نيبان الجهل مسمومه"
.........
ضياء الإدريسي