كلمة باحبك اللى انا بروزتها
على حيطة القلب اللى ليها ميت أساس
مش حروف محسوبة من ضمن الكلام
دى عبارة عن عصير معنى انى عاشق
شهدها المفروز مكرر.....والمقرر
انى اعيش بيكى ف سلام
وانى دايب بين ايديكى
وان مرضى السكرى
كان نتيجة للحلاوة اللى ف عنيكى
اشربينى واسكرى
وان مطاوعتكيش دماغك
غيرى كل الحواس
وان خلص كاس اشتياقى
لسه فيه ميت ألف كاس
اصلها مش بس كلمة
مرّه ضحكة ومرّه آه
لا ياعمرى
دى يمين بالله تلاتة
هيه فرصة للحياة....للنجاة
فرصة التوبة الأخيرة من ذنوب انى ابقى عايش
بس بايش
مش لاقيلى أى معنى...أى لون
زى ما يكون نفسى فيّا
ابقى ليّا...هاتى إيدك ويّا إيدى نلم دمى
اللى متفرق على كل المياه
ألف حسرة وألف آه
لا ياعمرى
حبى ليكى يعنى جنة
يعنى احافظ ع الفروض الخمسه لكن فى الجماعة
يعنى طاعة
حبى ليكى نية خالصة للعمل قرآن وسنّة
حبى ليكى يعنى عصمة
مش حكايه انه بس نصيب وقسمة
حبى ليكى يعنى بسمة
يعنى فرحة....لما تبقى كتاب يمينى
بس قدام الإله
حبى ليكى نفسى يبقى كأنه حسنة
تبدل الذنب القديم
نفسى يبقى بين صفا ومروة عنيكى
ساعى قلبى ساقى للحجاج نديم
حبى ليكى عاوزه رحمة
عاوزه يبقى ... استغفرالله العظيم
...............
حمدي موسى