بياخد منى أحيانا خطى زيادة
لكن دايما ببص لفوق
اقول يارب كالعادة
بتوه فى ضلمة الإحساس
ساعة لما بلاقى الناس
تدوس أرضى انا وانتى
وينتهكوا محارم حبنا البكرى
لكن يا حبيبتى تفتكرى انا نساى؟
يمين بالله يا محمية بحبى الأصلى
والمصنوع فى شريان الهوى الشرقى
بإيد قيس اليمين على نول الفتاة عبله
انا عاشق ومش عارف كمان ازاى
يمين بالله يا قمرية
وبتزقزق على شجرى اللى انا زارعه
فى راحة راحة النيه
انا باعشق تفاصيلك من أول شروق العين
لغااااااية طرف منديلك
ومن شرق العناد فيكى
لأقصى غرب تعليلك وتبريرك
باحبك وانتى مش فاهمه ان انا مجذوب
وإنى بادوب فى تسبيلك
ما ىتسألى روحك التايهه ولمسة إيدى تحكيلك
اغنيلك لو عاوزانى اغنيلك
برغم الصوت مهوش يعنى
لكن حبى اللى واجعنى
هايعمل منى ميت ذرياب
وهابقى موصلى ليكى
وهارجع بيكى لدروب اسمها بغداد
فاركة يا........ بغداد
بلدنا اللى بها عرق الهوى ممدود ف كل وريد من العربى
بلدنا اللى بقت أطلال بدون ناجى وسنباطى
بلدنا اللى انقطع فرط الأمل فيها
بقت من ضمن إحباطى
عرفتى القلب شايل ايه مع حبك
بشيل هم الجمال والذوق
شايل حلم يبقى له بطاقة فيها اسم امه
واسم الله داغير اسم النبى حارسه
عرفتى انا باحب ازاى ؟
باحبك حبى للأمة
باحبك حبى للإسلام وللإيمان وللإحسان
باحبك حبى للإنسان
عشان مخلوق بإيد ربى
باحبك حب زى ماتقولى كده قدسى
وفكرتينى بالأقصى برغم انى ما عمرى نسيت
باحبك قد بركة ربنا حوالين
بيته الأول القبلة
باحبك حب مش قادر اقول وصفه
باحبك قد كل القهر والفرحة وقد الدمع والأحزان
باحبك قد اللى اتخلق فى الكون من الألوان
باحبك حبى للميه فى صيف رمضان
فا وحياة الهوى فيكى ماتخسرينيش
وما تحاوليش تفارقينى
وخللى عنيكى ترقينى
انا عيان بحب الحب
وشيخ العرافين قال ان انا ملبوس
بلمسة إيدك الروعه
وقال اوعى تزعلها
عشان هيه الى فى ايديها دواء الآه
وحلفنى فقلت وراه
باحبك آه
وعهد الله وعهد الله وعهد الله
...................
حمدى موسى
حمدى موسى