=======
أصل الحكاية كلها هي ...
هي اللي حملت وتعبت تسع شهور فيا ...
وسهرت جنبي بالأيام مداديه
ولو ابكي تحس بألمي قبليه
يعدي اليوم ..
ما تعرف عينها طعم النوم
ولو أضحك ... بتضحك لي بحنيه
***
بنحكي حاجات ما تعرفهاش قلوب الناس
حوار بالعين ... وهمس القلب والاحساس
توشوشي ... تناوشني ..
وانا عنها ما بيحوشني .. سوي أني
صغير ما بطولش منها الراس
ابوسها ..
أبوسها وليها أتأسف ..
فتسمح لي أبوسها ف سري بالنيه
***
وبكبر شبر بالعافيه
ما بين ايامك الدافيه
تناديني .. يجيلك قلبي يتكفي
يقوم تاني .. تمدي ايديكي تخديني
تشيليني ... أحس بأني ف الزفة
يبان الفرح ف عنيه
***
ولما الخطوة يوم تشتد
وادب برجلي فوق الارض
بحس بحب فوق الحد
ونتصاحب
يا أجمل صحبه تتصاحب
بحبك والغرام صاحب
لقلبي والسنين جايه
***
يا قلب تماللي بيضحي بدون أسباب
يا سر الحب والبسمه ما بينا عتاب
انا الخاين لعهد القلب ما بينا
وهي اللي بتنسي كتير وتستنه
بذنب بتغفرلي وتتمني ولو
أكون وياها في الجنه
ودي حكايتي أنا وهي
..............
هاني عبد الوهاب