مليون سبب ... بقلم الشاعر / هاني عبد الوهاب

متخلي نيش أغلط وتقولي
قلة أدب
أنا بكرهك من غير سبب
ولو هقول أسباب لكرهك
ما يكفي نيش مليون سبب

***
يا مرمطانا .. مخليانا
نشبه كلاب السكك
يا مقعدانا ع الدكك
من غير لا شغله ومشغله
يا مجلجلة
يا عامله مليون مشكله
سيرتك فضايح 
 في الفضاء والنت
يا شريفة ملهاش .
في الهز أو في التت
أما أنت حتة بت
بنت الليالي العامرة بكاسات
وسط البارات الساهرة .. لذات
والمزة طازة
والضحكة رنانه وآهات
آهه بشوق الملهوفين
والتانية والناس نعسانين
***
وانت الشريفة العاهرة
رسمة الشرف على ديك أبويا
وفرخة أمي والحمامة
عامله لنا أيه عندك كرامة !
***
أما الغريب
أبو ناب وقرش
لبسا له توبك شفتشي
لا بتستحي ولا تختشي
والليله حمرا ومشمشي
أما الاشي
يا سلام يا واد على كل شي
***
فرحانه ويّا الفرحانين
ومحزنانا طول سنين
ولا مرة لينا بتنتشي
***
طلعتي عيني وعين ولادك كلهم
يا مجوعانا وعامله حفله لكلبهم
***
يلعن ستارتك والغطا
شبعنا غلب ومرمطة
أحنا ف كابوس
وانتي في غايه الزقططه
عايشة ف نعيم
أما أحنا عايشين ملوطه
***
ما تفكي كيسك واشتري لنا غيار
العورة بانت والزمان دوار
سكن الحدادي ف حينا
واحنا سكنا ف نار
***
فين لقمتك وغموسك ؟
فين العشا والمي ؟
مين للجناين حصد ؟
حمّل وما ساب شي !
***
مين اللي باعك عزب
درهم قصاد قنطار
مين اللي سترك جسد
قبل اما ييجي العار
***
لو كنتي فاكرة الغريب
يستر على عرضك
طب يبقي مين السبب
ف الغلب وف مرضك
***
أنا البعيد الغبي
لا فهمت .. ولا هفهم
أخلاقي قال مذهبي
عايش بخوف وبسلم
***
فن الصياعة وجب
يا مو البضاعة عجب
أيوه أنا بكرهك
وعندي مليون سبب
متخلنيش أغلط
وتقولوا قلة أدب
..............
هاني عبد الوهاب