وسلمتك مفاتيحى
ووريتك طريقى منين
وعرفتك مزايا القلب وعيوبة
وحفظتك لأسلوبة
وحصنتك بنظرة عين
ورسيتك على القصة من المسرى
لغاية لما نستسلم نقع أسرى
تكونى اليمنى واليسرى
أكون الأعلى والأدنى و بين البين
وحبيتك ولا فكرت فى الدنيا
ووقفت الزمن عندك
ولا اتحرك ولا ثانية
ووديتك حياة تانية ووصلتك لعليين
وعلمتك بإن الحب لاهمسة ولا لمسة
ولا قمرة ولا شمسة
ولا أصبح ولا أمسى
وأكتر من حواس خمسة
عشان الحب دا معنى مالوهشى شروح
خديها من جدع راكب سفينة نوح
انا والحب كنا اتنين سألته والسؤال بوضوح
انا من طين
فقال لى قبل ما تكمل وانا من روح
وقلبى دار على نفسه فصنع الحزن والأفراح
ولما دار حواليكى بقى صخر الجبل تفاح
بحبك حب متنقى بدون لكن
مشاعرى حروفها مبسوطة مفيش فيها ولا ساكن
ومش قايل كما الشعرا ومش قايل كما العشاق
فى آخر الحب والأشواق يروح قايل تخونينى
مانيش قايل تخونينى
كما لو كان قصايد الحب لازم تنتهى بتحذير
كما لو كان فصول العشق لازم تنتهى بأمشير
حبيبتى حرير
انا وهيه صحيح الحب والتفسير
دانا بينى وبينها كتير
دى أحلامى وإلهامى وتنهيدى
دانا مربيها على إيدى
انا أصلا مانيش خايب
انا شاعر وله نايب ف كوم الحب والأشواق
حبيبتى لوحدها صفين
ويقفوا قصادها ع الجنبين
ميت عبلة وميت ليلى
وانا لوحدى بميت عنتر وميت مجنون
نساء الدنيا مخلوقة بكلمة كن
حبيبتى طلعت الأولى بقت فيكون
اهد الكون
اذا بانت ولو خصلة من المستور
انا من راشدين الحب
انا الصديق فى غربتها
وانا الفاروق فى محنتها
وانا اللى كرمت وجهى بنظرتها
وانا ذا النور
حبيبتى لاهيه إنسيه ولا فى الأصل جنية
دى فكرة حب منسية وبتجينى ف وسط الناس
بتسألنى عن الثورة
اقول الثورة سلمية
تقوللى صدقت
فاتسألنى عن الفكرة
اقول الفكرة حرية
تقوللى صدقت
فاتسألنى على بكرة
اقول بكرة مالوش نيه
تقوللى صدقت
فايجى شهيد ويسألنى
دى مين ديه.. اقول له دى مصر
تركيبة من الإيمان على الأحزان على الألحان
وظهرت نزلة أخرى
فى قلب ميدان
وكانت قاب قوسين من العنوان
وكان فاضل يادوب ركعة وتاخد أجرها خمسين
أتارى القبلة معكوسة
واتارى الضهر للحرمين
............
حمدي موسى
شكرا كل الشكر للشاعرة الأ
ردحذفستاذة منى الغريب