** بهانه **** بقلم الشاعر / رضا ابو الغيط

شوفت بهانه اليوم فرحانه
بعد ما كانت كده زعلانه
شوفت الفرحه ساكنه عينيها
وف مخازنها حَب دُرانا

شوفت حمام بيطوف حواليها
شوفت الخير كده ملو ايديها
شايله الفرحه ولابسه الطرحه
وكل الدنيا...... بتهنيها
آه يا بهانه البال ارتاح
لما قابلتى اليوم فلاح
صان العرض وزرع الأرض
وف قلبك.. طرحت أفراح
حلوه قلوبنا لو مليانه
زى الزعله خير وأمانه
مروى انا منها
ومنها اتحنى كف بهانه
كل الدنيا يا ناس فرحانه
ويا سنابل قمح بهانه
حتى سُباطة نخلى العالى
ويا نجوم السما سهرانه
حاضنه الليل على شط النيل
على انغام الهوى بتميل
سألت قمر الليل يحرسها
رد وقال.... أمرك يا جميل
محلى عيونها عيون عسليه
هى الفرحه وضى عينيا
محلى الضحكه ف خد بهانه
لما بتضحك ف الصبحيه
.............
رضا ابو الغيط