أقولك ياشاعر بكتب لمين
بكتب لكل البيوت والشوارع
لكل اللى شاهد وشايف وسامع
لجرس الكنايس وصوت الجوامع..في وقت الآدان
بنكتب عشـــان..
مفيش حد غيرنا حيقدر يقول
ويقـدر ينـور.. ضلام العقول
وياما القصايد بتطرح حلول..لبـر الأمان
أقولك كمان..
بنكتب لمصر الأصيلة الأبيـة
عشان مؤمنين بالهوى والهوية
وقلمك.. وقلمي سواعد قوية..وأفصح لسان
وتعرف يا (مان)..
بنكتب.. لكل المعاني الجميلة
لصدق المحبة ومعنى الفضيلة
وبتهون علينا الليالي الطويلة..وغدر الزمان
بنكتب كلامنا لكل الظروفْ
بنشعر بغيرنا ونقدر نشوف
منقبلش أبداً.. يكتفنا خوف..بصمت وهوان
عشان اللي تايه.. يلاقي الطريق
ساعات كلمة صادقة بتنجد غريق
ونسمة مشاعر بتطفي الحريق..
وتغسل قلوب البشر بالحنان
وتعرف كمان..
بنكتب عشان الكتابة.. رسالة
بندخل بحالة..ونخرج بحالة
ونوصف شعورنا بصدق وعدالة...بدون امتهان