بستعطفك
قلبي اللي قادر يخطفك
من ألف نجمه م السما
او ... ربما
من ألف ذئب والف حوت
أصله ابن موت
أوقات عبيط
عارف حدود الشط
بيكون السمك
مش ف الغويط
إلا اللألئ والدرر
وانتي اللي قلبك بسكويت
من هزه واحده بيتشرخ
فيصلي في جامع ( علي )
قلبك (ولي )
قلبي غبي
لساه بيبحث عن نبي
لا رمح (وحشي) غضبه
لا سيف (معاويه) كهربه
قلبي كده !!!!
مش زي كل الافئده
مين عرفك ؟
قلبي اللي قادر يخطفك
تنين بينفخ ألف نار
ويخبي قلبك سوسنه
جوه المحار
لا ألف فارس يقدروا
لا الف رمح يغيروا
هذا المسار
( حرن الحمار )
تربس رجوله الأربعه
قطع اللجام
لابد تيجي المطبعه
تطبع كلام
حبي وحبك ملحمه
بحر وسما
حبك عما ......
شاطر بيضرب
إنما ......
تحت الحزام
حبك خطر
لاكن مطر
بيبل كل العطشانين
أقصد هنا
ريقي وطحالي
وكلوتي
يعني بيمشي ف جتتي
دافي ونبيل
بتوضي من ريقك يانيل
واختم علي سورة (يس)
واقرا التشهد مرتين
والمس مقامك يا (حسين)
قلبي كده !!!!
مش زي كل الأفئده
مين عرفك ؟؟
قلبي اللي زارك في الخفي
طبطب علي الجرح اختفي
يقرا ف كتاب المعرفه
للسمره دايمن حلمها
عين المها
بتبعتر الناس ع الهوا
والله بإيده يلمها
قلبي اللي ساع الكون
كل الكور ف الجون
مغلوبه ليه وانتي السبب
عودي .. بيعزف لك طرب
يالا اسمعي
لحن الغضب
مش كل مره حتلاقيه
تحت الطلب
الحب من بعدك غبا
وقلة أدب