رقــصــــــة ف ســِـرَّك ...بقلم الشاعر / أبو عمار المصري

وقعدت استنى شطانى المجنون
ييجى بكلمة
ييجى بحرف
قـفـِّلت جميع الشبابيك
فى الكون
وفرشت الأرض المبلولة
بعرق الأيام
أستنى الكلمة فراشة
تحُـطّ على ورقــى
وقلعت هدوم وجـَعى وقـَلقى
عـَلــَّقـت بقايا الروح
على شمـَّاعة وِحــدة نفسى
ويضيع الظرف زمان و مكان
وانا واقف بين نفسى ويأسى
تـِتمـد إدين تـِخطـَف روحى
وتاخدها تطير
تـِغـمـِسهـا ف بحر غريق
وشطوطه بعيد
وما لوهشى قرار
وانا شايف كل الأسرار
تتكـَشـِّـف . تخرج هربانة
من سجن حصار
وتعـَلـّى لفوق
والروح فى البحر الغرقان
بتحاول تمسك فى الأسرار
وشطانى ما جاش
والسر المتخـَبــّى ف قلبى
بين عينى ونفسى ما عدّاش
كل الأسرار ..
نزعـِت كل غلاف الجـِلــد الشفـّـاف
لـِبـسـِت توب أبيض هـِفهاف
وشطانى لـَمـَحت ف عينه الخوف
وجناح من ريش والتانى سيوف
والسر..... السر الـمـِدّارى
حرفين من كلمة ف أشعارى
رافض يخرج
رافض يكشف عن مكنونه
ولا سـَلـِّـم عقله ولا جنونه
وشطان لابس توبه الزايف
راسم ضحكة وشه الخايف
وتعدى الروح
البحر الغرقان وتسافـِـر
تسكن بدنى
وتفـَتـَّـح عينى
واشوف السر المدارى
البطل الأوحـَد فى الساحة
يـرقـُـــص وحــــدُه
فى موسيقى الروح المبلولة بعرقى وقلقى
حرقة نارى
يسكـُن آخر نقطة حـَصينة
فى تجاويف الروح يـِبـنـى مدينة
كلها أسرار
من غير أسوار 
......................

بـقــلـــم ا لــشــــا عـــــــر
أ بــــــو عـــمـــــــــا ر ا لـــمــــصـــــــــــر ى