الخطاوى..... بقلم الشاعر / رضا ابو الغيط

ماشى الخطاوى بحكمتى
عارف طريقى وسكتى
مستنى نور الفجر يوم
يمسح بإيده دمعتى

مستنى لشعاع الامل
والهم راسخ كالجبل
والحمل فوق كتف الزمن
و السكه مش عاوزه العَجل
آه يا خطاوى المجروحين
ها نروح لمين ونروح لفين
وليه كاسات المُر ليه
شايلاها ايدنا من سنين
يا شمس طلى ع الحياه
ومدى لينا طوق النجاه
فينا اللى عارف سكته
وفينا الغريق ف البحر تاه
الله على نور القمر
لما يطل ع البشر
بدوق معاه طعم الحياه
والخير ف حبات المطر
عصفور ونادى ع الشجر
فين الأمانى يا بشر
أحلمنا فين وليه حزين
فى قلبنا لحن الوتر
يا مخلصين يا طيبين
بكره تنولوا بصبركم
بكره النجوم السهرانين
ويا القمر ها تضمكم
بكره العيدان تطرح أمان
والفجر يرجع له الأدان
لما يتوب كده م الذنوب
كل اللى باع أو حتى خان
.....................
كلمات / رضا أبو الغيط