بوحي
وامسك ف إيدك
واعدي بحر أيامي
أنا الصباح الابيض
وساعة الفجر
ايه لوّن ف الصفا السابح
في أرض الله ...
بلون الغدر ...؟!!
يا سيدي الزمن
أنا الضعيفه ..
مكسورة الكلمة
متشاله علي عكاز
مبروزين دنيتي
ف تابوت قزاز
وانا اللي كانت
ضحكتي...
كما النوّار
شافني الحبيب
حليت في عينه
بقي ...استعمار
سقطت قلوعي
في سطوته
تبرق عنيا في الليالي
المعتمه
يتهد حيل الحلم
والامنيات
وانا اللي...
رسمت م البيوت
ع الرمال ادوار
واستنظرت...
الواد الفارس
يدبح في قطة خوفي
ويطيّر الغربان من ساحة
القلب اللي مسُّه لانشطار
خنق البريق
في لمعة عيون
النهار
ماتت في الروح
اجمل الأسرار
تتنهد الحكايات اللي
انتظرت تبقي حياه
ياه ه ه
يا بُكره لسه ماجاش
مركونه ملامحك
من زمن ف الطل
وباشب ..حبَّه
واطول آخرنفس
ف الضل
تحِّدني نظرة عنين الليل
وقساوة قلب الصخر
يا من قسم روحي
طير طاير بعيد
ومشوار مالوش
معني
هو اللقا بقي ..موت
واللا الفناء هو اللي ..
جمعنا ...؟!!
علشان نطول الهوا
فنقفل عيونه
ونهدد روحه
باسم الشوق
وإن كان مُناه
يصعد لفوق
بنرجعه لأول خطوه ..
حطّها ع الأرض
.................
زينب أبو الفتوح