( حصة إملاء )
___________
أمسك قلمك
وأكتب علي جبين الورق
كلمة ( وطن )
شايف الشجن
راسم خطوطه ع الوشوش
حاول تحوش الدمعة
لتبل الورق
وأكتب فـ أول السطر اللي جاي
وطني اتسرق
وحط بعده نقطتين
وأبدأ السطر اللي بعده
بدمعتين أو صرختين
وأفتح قوسين
وأكتب ما بينهم ( دم الشهيد )
لساك عنيد ؟
عمال بتكتب من دماغك
ضاغط صباعك ع القلم
زي الزناد
مين قال يا تلميذي النجيب
تكتب حداد ؟
وليه بــ السواد
عمال تبروز صفحتك؟
أكتب وطن
الكل باعه بالرخيص
وساعات كمان من غير تمن
والمؤتمن
باع ذمته في سوق النخاسة
وأهل النجاسة
بيكفروا الفرج العفيف
وأياك فــــ يوم
جنب الوطن تكتب كفيف
أكتب وطن
وسيب اللي باقي للزمن
وسيب القلم
وقول يارب ما تطول المحن
يارب ما تطول المحن