وليه يعني ؟!
تلملمي نبض أشواقي
وتفّرشي
جنّتك بورود
ونا الموعود
ومتحرّم على قلبي
دخول جنّة
فيتحنّى
بنار هجرك
ويتمنّى
تزيدي النار
ويصبح عار
عليه لو يوم
يعوم ف بحور ماهيش ليكي
ولاّ موجها
يموج على شط
غير شطك
وليه يعني؟!
هواكي يطوول ف أحلامي
وتجرحي فجر أيامي
وبرموشك
تداري الشمس عن عيني
وتهديني
الضنا ألوان
وبالإمكان
أبيع الحب لو باعني
لكن قلبي
بيتحمّل عشان خاطرك
فيتفاجئ
بإن اللي
ل هواه عاشق
ماهوش فارق
معاه دمعهُ
ولاّ سامعهُ
ولاّ يوم شاف
طواف قلبي ف محرابهُ
ولاّ دقاتهُ على بابه
وبابه إزاز
مراية حيط
بيعكس أي تصويرة
وماف عمرهُ
بينقل صوت
ونا والموت
نبص ساعات لبعضينا
فيستغرب ويسألني
ليه راضي تكون
كما "يونس "
ف بطن الحوت
وما بتدعيش
يحوش الهوى عنك
ليه راضي تعيش
كما " أيوب "
وهىّ أكيد ماهيش " ناعسه "
ولاّ حاسّه بنار تكويك
ليه راضي تموت كما " أوزوريس"
ولسّه " إيزيس" بتعشق " ست "
تشيل وتحط ف الأوهام
وكلهُ كلام
ما بيعدّيش حبال صوتك
ليه راضي تعيش
كما " حتحور "
ف بيت مهجور
تدوّب كل أحلامك
وأيامك يادوبها حروف
حرقها الليل ف سهراية
فتيل قنديل
عشان هىّ
ما تتزوّق وترقص لهُ !!
..................
محمد البنا