وفـْرِحتى لمّا عرفتى
إنـّى ف بطنك بتخلـَّق
جواكى ف قلب حشاكى
حتة لحمه ومتعلــَّق
من دمك باكل واتغذّى
وبارفـَّس فيكى برجلـيّـَه
ولا عمرك قلتى أنا بتأذّى
لا ف رُوحَه منى ولا ف جَـيّه
وضلوعك كانت تتوجَّع
واللقمه ف جوفك بترجَّع
والدوخه ف شهور الحمل
وف بطنك باسرح كالنمل
وفضلتى يا أمى بتستنى
عايزانى أجيكى وتتهنـِّى
وبتحكى لابويا عن شكلى
وبتاكلى ياأمي عشان أكلى
مربوط أنا فيكى بالسرَّه
وشهورى التسعه كانت مُره
وولادتي وآلام الطلق
والموت بعنيكى شوفتيه
وعذاب أنفاسك والحزق
محشور أنا فيكى كماللزق
وصريخي لما سمعتيه
قلتى يافرحة قلبي بحق
ونسيتى كل عذاب دوقتيه
كان اول شوفي
ف الدنيا عيونك
بالضحكه مليانه حنان
رغم الدنيا الواسعه الهـِو
من لمسك حاسيتها أمان
يا حلاوة الفرحه باحساسك
طلعتلى سنان
وانا لسه صغيّر ف اللفه
تاخدينى ف حضنك بدَّفه
وتدلّى فيّا وتشيلى
وبصوت حنيّـَه تغنيلى
وتقيسى بالشبر وكفه
وتقولى امتى يا نور عينى؟!
أرقص يوم فرحك ف الزفه
وحابيت تا تا تاتا وباخطـِّى
وبحضن حنانك متغطـِّى
أنا كنت يا دوبك بشاورلك
وما حدش يفهمني عاديكي
ويالهفة قلبك على وجعى
والفكر اللى معشعش فيكى
وتقضّى ليالى سهرانه
ف غيابي والنوم يجافيكى
ياما كنت اتشعبط ع اللعبه
وحتما لازم تجيبيها
ياما كنت اتشاقى وبأضايقك
وغلاستى كنتى تحبيها
وكبرت وكبرت أحمالك
ولا قادر أوفيّ لافضالك
وكأنى أنا لسايا صغيّر
على حسّك قاعد بتدلـَّع
لو مرّه أتأخر تتشغلى
وحريقه ف قلبك بتولّع
والعقل بيفضل متحيّر
لو شفتى عيونى السرحانه
بتقولى أنا فاهمه لملامحك
وساعات ف أعيادك بنساكى
وتقولى قلبى أنا مسامحك
مين غيرك على قلبي حنيَّن
و بنقسى وقلبك ليه ليّن ؟
من غير قصد جرحت مشاعرك
من غلطه وغلطه تعدِّيها
ولا قلبك زعلان بيبيِّن
دا حنانك نبضه فى وريدى
والورده الحلوه على غصونها
يانعمة وغالية ما بين إيدى
وفقنى يا ربى أني أصونها
لو عدّى البعد في يوم بينا
من غيرك أنا قلب جريح
من بعدك واقف وحداني
متكتف وف وش الريح
ندمان ع اللحظه اللى ماكُنتش
كسبان لرضاكي
زعلان ع الكلمه اللى فاتتنى
من بر دعاكى
سامحينى يا أمى
ع اللحظه اللى ماكُنتش
باقضيها معاكى
.......
راضي الطهطاوي