أربع حروف وقمر ... بقلم الشاعرة / زينب ابو الفتوح

أربع حروف وقمر مستني
على سطح بيتنا
الزين .. زمان
كان جميل بينطق
جوه قلب الغيب
و يحضَّر الذكرى
الياء .. يمامه
و كنت باعشق زيها
ملفوفه بالحلم طايره
لفوووق
النون .. نصيب
معقود على جبينك
يا نيل
يتعددوا الجايين
يتمنوا يوم شهدك
ـــــــــــــــــــــــــــــــــــــــــــ

يحلموا بزهو احتلالك
لكن .. بعيد عنهم وصالك
و الباء .. باكون نفسي
لما باحب ..
بادوب ف طيف القمر
و اتدارى ف تنهيدُه
با حبي على سطح دارنا
و اتخبط ف عماويدُه
و بتشاقى ف حجر امي
و يخبيني ابويا
ف صوته
أكون .. أعيش
أربع حروف
ــــــــــــــــــــــــــــــــــــــــــــــ
من طين
و جوز عيون
معجونيين بالصدق
تلاتين سنه
و العمر بايش ف دمع الندى
مين ابقى انا ؟
و ازاي باعيش
بره خطوط الحب
بره لهيب النار
لبيستني العمر
و لا بيهدى خطاه قدامي
و لسه سؤالي بيتمرجح
بين صوابع نجمه
ــــــــــــ
من يوم ما اتولدت
مين ابقى انا ؟
كرَّيت ايامي وسالت
طاطت و تاهت ف ركن
مليان كراكيب وجع
بصيت لصورتي ف
قضبان المرايه
اتنهدت دابت بخار
باشت على عتبة سؤالي
تلاتين سنه
نفس الكلام
بيتردد على لسان النهار
ـــــــــــــــــــــــــــــــــــــــــ
و الليل
و العمر زايد لا يوم جاب جديد
و لا خد من تل الملل
و لا مَّلْ العالم من
كتر الكدب
و لا يوم وقفت رعشة حلمي
بالحريه
و لا يوم .. بطلت استنا
القمر
على سطح بيتنا
.................
زينب أبو الفتوح