وليه يعني ؟
تلملمي نبض أشواقي
وتفرشي
جنتك بورود
ونا الموعود ومتحرّم
على قلبي / دخول جنة
فيتحنّى
بنار هجرك
ويتمنى تزيد النار
ويصبح عار
عليه لو يوم
يعوم ف بحور ماهيش ليكي
ولا موجها
يموج على شط غير شطك
وليه يعني ؟
هواكي يطول ف أحلامي
ويجرح
فجر أيامي
وبرموشك
تحوشى الشمس عن نني
وتهديني
الضنا ألوان
وبالإمكان
أبيع الحب لو باعني
لكن قلبي بيتحمل / عشان خاطرك
فيتفاجئ
بإن اللي ف هواه عاشق
ما هوش فارق/ معاه دمعهُ
ولا سامعهُ
ولا يوم شاف
طواف قلبي ف محرابهُ
ولا أناته على بابه
وبابه ازاز / مراية حيط
بيعكس أي تصويرة
وعازل صوت
ونا والموت
نبص ساعات لبعضينا
فيستغرب ويسألني :
ليه راضي تموت ؟
ف بطن الحوت كما يونس
وما بتدعيش
يحوش الهوى عنك
ليه راضي تكون كما أيوب
وهىّ أكيد ماهيش ناعسه
ولا حاسّه / بنار تكويك
ليه راضي تكون ؟
كما أوزوريس
ولسّه إيزيس بتعشق ست
تشيل وتحط ف الأوهام
وكلهُ كلام
ما بيعديش حبال صوتك
ليه راضي تموت كما حتحور ؟
ف بيت مهجور
تدوّب كل أحلامك
وأيامك
يا دوبها حروف / على ورقة
حرقها الليل
ف سهراية فتيل قنديل
عشان هىّ ما تتذوّق وترقص له
......................
محمد البنا