وبقيت متخصص في عذابي
وكأنك بتحضر فيا
أول رسالات التأديب
واللي مصبرني يانور عيني
إن أنا عارف
إن أنا جواك أغلى حبيب
أغلى من روحك ..من نفسك
وكمان نفسك
تعيش العمر مني قريب
وبقيت متخصص في عذابي
بكره مناقشة
منحك درجة دكتور في فنون التعذيب
تمنح وبدرجة ممتاز
وسيصدر أمر بتعيينك
جوه ف قلبي
علشان تتحكم فيا أكتر
ودا حقك عندي ياروح الروح
وهتفضل أوفى وأغلى حبيب
وهقوم بطباعة أعمالك
ع الانترنت
هنشر لك فيديو على اليوتيوب
وهوزع صورتك ع القنوات
هعملك كارت عليه رقمك
هكتب ع الكارت
دكتور معروف
دكتور في الحب
متخصص دايما تعذيبي
ورغم قساوته
صادق جدا
وبحس الشوق في عنيه وبشوف
دكتور معروف
اعمل معروف أرجوك فيا
ماتقولشي لحد إني بحبك
علشان العين
والعين محتاجة نقيد ف بخور
ونجيب ف عطور
ونربي طيور
لجل الجني
واكمني بدوب
من نظرة عين
من تشبيكة لصوابع إيدنا ف بعضيها
راح أقول للكل حكايتنا
وبكل صراحة راح أرويها
دكتور معروف
عشقي الأوحد
سلطان روحي
عينته مدير على نبض القلب
عينته رئيس جامعة عشقي
وأنا عشقي إليه أكتر بكتير
من كل الناس
دكتور معروف
اعمل معروف
قرب مني
.........................
عبدالتواب الرفاعي