و ليه الضحكة مكتومة ؟
ف نبرة صوتك الموجوع ..
و ليه الفرح متداري ؟
و بيسافر مش باينله رجوع ؟
أنا عاشق علي بابك ..
حفرت الشعر في كتابك ..
أنا الزاهد في أعتابك ..
أنا أهلك و أصحابك ..
و أنا الخادع و أنا المخدوع ..
أنا إللي ف بحر الميت ..
بسافر مش باينلي رجوع ..
أنا إللي كسرت مركبتي ..
لكني بحاول أتعلق علي الساري ..
و لسه شوقي متداري ..
و لسه نهرك الجاري ..
معايا ف ليلي و نهاري ..
بينقل كل أخباري ..
و مش داري ..
بإن الفرح شئ ممنوع ..
أنا بيني و بينك ليل ..
و نص نهار و وادي و سيل ..
أنا إللي بس علشانك عشقت الخيل ..
و نمت فوق تراب الصبر ..
و دوقت المر جيل ورا جيل ..
أنا إللي تعبت من جوا ..
بحبك هفضل أكتبها ..
بحبك في زمان الجوع ..
........................
مصطفي تيسير