ولأنك ساكنه رموش العين
ووجودك عندي مالهشي بديل
ولأنك بالنسبة لي
أكتر من النيل
أكتر من حاجتي
لصوت البلبل والكروان
ولأنك أجمل منظر
وأحلى مكان
زلزال له توابع
بركان بيهز مشاعر بني ادمين
وأنا مين
وازاي
وهعيش من غيرك
مش ممكن
لابديل عن لمس اديكي
عن نظرة عين
أغرق جواها لحد النوم
وف بحر النوم
بغرق جواكي
ميت مرة
ولامرة
طلبت رقم النجدة
ولامرة صرخت وقلت غريق
وبرئ من كل اتهاماتك
إني بخونك
أوحتى مجرد تفكيري
مش هسمح أبدا تسبيني
تبعدي عني
تهجري روحي
مش هسمح أبدا تنسيني
والله برئ
كل دا تلفيق
من ناس
كل مناهم
يحسوا بحرقة قلب اتنين
عايشين الدنيا
بروح واحدة
ولاواحدة تملى العين غيرك
وانا غيرك تايه مش موجود
وملهشي حدود
شوقي أنا ليكي
بهديكي حاجات
مش متشافة ولا مرئية
يكفيني الرد
لو نظرة عين
مكتوب جواها
إنك ليا
.....................
عبد التواب الرفاعي