حنينى إليك ... يفرحنى
بتجرحنى ....
وتسرق فرحتى منى
تموت الضحكة ع الشفة
ينز الجرح .... يتصفى
تشوف الدمع تتشفى
وتتبسم .... يبان نابك
وانا والقلب ف رحابك
يطب الهم بالكفة
ومين فينا اللى بات مظلوم ..؟!!
ومين فينا اللى كان أوفى ..؟!!
وبين الماضى والحاضر
مانيش قادر
اشوف قلبى اللى كان قادر
يبيع الدنيا ويجيلك
ف زحمة خوفى من بكره
يسيل دمعة ف منديلى ..!!
على فكرة ....
ده منديلك .... وكان ذكرى
صبح هو اللى باقي لى ..!!
منين مالشوق يناديلى
يقولى مسيرها يوم تصفى ..!!!
.............
سعيد شكري