و اكون انسان
وما باخافشى فى يوم من جان
و لا يرهبنى سور سجان
و باملا عنيا م الدنيا
و احاسبها
و مش قابل اعيش متهان
فباختار سكتى بكيفى
و بامشى لوحدى زى زمان
بالم ايامى فى كفوفى
و باتخانق مع ظروفى
و حابس فى الدولاب خوفى
و ياما كتير بابات سهران
و اصاحب صاحبى ع الاخر
و نتكلم .. كلام ساخر
و مش بارجع و لا اتاخر
و احب كتير اوى الجدعان
و اصون ودى و ما افجرشى
و من يأمنى ما اغدرشى
و ابعد بس ما اهجرشى
و لما اعشق اكون ولهان
و امد ايديا للعايز
و ياما كتير اقول جايز
و مغرم انى اكون فايز
و اقوم امشى بلا استئذان
و باكره كلمة التعقيد
و احافظ جد ع المواعيد
و اقرب بس بابقى بعيد
و متطمن و مش قلقان
و نفسى كمان فى ميت حاجة
و عادى باقولها بسذاجة
صحيح انا روحى محتاجة
لكن باحلم ... اعيش سلطان
و اكون بين البشر .... انسان
.........
فهمى على