سايق عليكى الأوليا ...
تِـمسحى ..دمعة عنيكى
دى نازلة نار
على قلب قلبى ..بتحرقـُه
ومقطّـعة شريانى منى بالوجع
على ألف سـِكـَّة
وميت رصيف ... بتفرقه
سايق عليكى الأنبيا
ما تسلميش للضلمة يوم
لو باقية شمعة ف جتتى
وبنارها ..هـتـنِـّز الهموم
هاستحمل النار والوجع
وانت ..
بنورها تـفــرحــى
تتونـّسى
تتدفـّى على حرقة جراحى
وجِـتـّتى
واقلع عيونى تشوفى بيها
فرحِـتِـك
وانزع أنا ...
جلدى اللى ساتر جتتى
وانت يا غالية
تتكـِسى
سايق عليكى الرقوة
وبخور الحسين والسيدة
لا تقومى وتكيدى العدا
كنا احنا فين ؟
وأنت فين ؟
لما انت شيلتى الـهـَمّ
على كِـتـفِـك سنين
ولا يوم بكيتى
أو شكيتى م الألم
ولا يوم عملتى معـَدّدة
يا مؤمنة ..يا مريميـّة وطيبة
ومـسَـبَّــحة وموحـِـدة
ليه كل دة ؟
سايق عليكى الدم
سايل ع الطريق
لا تطفى بإدينا الحريق
وتكونى
زى ما كنتى دايماً
طوق نجاة
وتلملمى كل الجراح
وتفـَتّــحى .. شمس الصباح
وترجعى الحلم اللى تاه
يا كل طلعة شمس
من نور الإله
يا عشقى
من يوم مولدى
والعمر كله
لمنتهاه
سايق عليكى
فرحتى يوم نَصرتـِك
لـَمـِّت ولاد وسط البلد
واللى هناك
على طرف رسمة خرطـِتـِك
من الشمال ومن الجنوب
حتى اللى مات
واللى اتولـَد
كل العيون متجمـَّعة
ومدمـَّعة
دمعات فـَـرح
وقلوب بتحضـُن بعضها
والنور ....طـَرح
من جدر أرضِـك للسما
شريان وواصِل ...بالمدد
سايق عليكى عريس
وضحـَّـى بفرحِـتُه
وشهيد
وسلـِّم روحه من يوم ما اتولد
ونسى يسَلـِّم جِـتـّتـُه
وعروسة ماسكة ف جلابيتـِك
بالأمل
مش مُـحتمَــل
ترجع بشوقها للعريس
ولا فرش بيتها .. تستـّفـُه
عصفورة .. ريشها من دهب
والنسر لاجرب ...نـَتـِّـفه
كان حلمها
يكمل فى حُـضنـِك ..فرحها
وتزغردى لها
وبإديكى
تقيدى أجمل .. شمعها
قـِدتــى الشموع
على قبرها
سايق عليكى
كل رقـعـة ف جِـتـِّتــى
سايق عليكى الشعر
سايق ...كلمتى
وحروف سطورى التايهة منى ف دنيتى
مش نزف قلمى ... صدقينى
دة نزف دمى ... ودمعتى
مـوجـوع ...أوى
دمـعـِـــك
حارقنى بالأوووى
عايز ...أصَرّخ
إسمعينى ... قـَرّبى
صوتى خلاص
ضاع فى الرصاص
واللى باقى لى ..
نبضة بتعا فـِـر عشانك
إسمعيها والنبى
سايق عليكى كل دول
لا تـِـفــرَحـــــــى
وتـفـَـرّحى ...دمى الطرى
لسـّاه ما جـَفـّـش
زى ماهو ..ف مطرحى
......................
أبو عمار المصري