موجز الأنباء عن رحلة الإسراء.. بقلم ناصر صلاح

من ديوان حبة تراب. من أغانى حرفوش المجذوب
@@@@@@@@@@@@@@@@@@
مهما قالوا 00
واختلف فيه الرواه
بالروح رآه 00 وللا بعينيه ؟!
هوا رآه
هو اطمأن وزاد يقين
واحنا برغم الإثباتات
والمعجزات 00
يوم بعد يوم
بيقل ونقول مسلمين
عاوز أقول 00 نفسى أقول
ما اعرفش انا لغة الحياد
ما اعرفش اقف بين البينين
السيف لوحده فى الوغى00
إيه راح يفيد؟!
محتاج لفارس والجياد
نفسى أقول 00 عاوز أقول
خايف بجهلي أزعله
ما هو برضه قال:
إن اللى جاي 00
سيء وأسوأ راح يكون
يعني بلغتنا في الزمن ده اسود وطين
لكنه قال:
إن احنا فى الأيام دى خلف المشركين
شبرا بشبر وزاد كمان
بس اللى ماسك ع العقيدة مهما كان 00
من محدثات 00
من مغريات 00
من مرعبات 00
زى اللى قابض ع النيران00
بالطبع دولّ المنصورين
@@@
عاوز أقول 00 نفسى أقول
إن النبي أسرىَ به وكمان عُرج
مش بس ترويح للنفوس
إصحوا بقى طال الكابوس !!
راح النبي بأمر الإله00
الأقصى لجل يقول لنا
إن احنا أهله وعزوته
واحنا المدافعين عن كرامته وعزته
دلوقتى لو قام مننا ليثٌ جسور
يمنع يهود الأرض عنه نسكته
نلقى خفافيش الظلام00
بتقول له : حاسب فيه سلام
خارطة طريق
بينا وبين نسل القرود والعم سام
حب ووئام
والاتفاق ان احنا ما نروحش لهم
لكنهم
مرحب بهم
فوق الخلايجه والمغاربه والشوام
أما احنا متباعين لهم 00 ومن زمان 
أنظر على باب وهمهم
مخطوط ومرسوم رسم داخل قلبهم
م النيل مرورا باللى بعده لحد ما نوصل فرات
بيقولوا دوت ملكهم
بس العجب
إن الرسول فى رحلته
شاف أربعه
نهرين وظاهرين له قوي
نهرين كمان على بعد مش ظاهرين قوى
لما سأل جبريل ، فقال:
الظاهرين هما الفرات والنيل
والغامضين 00 م الجنه دول نابعين
ما تفكروا يا سامعين
م الرؤيه دى إيه نفهمه
ونربطه بوهم اليهود
أجى برضه برضه وفى النهاية باقول:
علشان نفوق م الوهم ده ونبطله
إحنا الحمايه والأمان
لكل أمه وأرض جاها رسول إيمان
@َ@@
عاوز أقول 00 نفسى أقول
صلى النبى بالأنبيا
علشان يقول :
احنا يا ناس أولى بهم
من قومهم
من أهلهم
أمنا بيهم كلهم
لا قولنا يوم عيسى إله
وللا يا موسى اذهب وربك قاتلا
واحنا هنا 00
نصنع في عجل ونعبده
أما اللى فوق كان العجب
ذهب الحبيب لمن أحب
لازم هناك تفرض صلاه
هى العماد
لازم تكون فى المنتهى
ده لأنها
هى بصراحه المنتهى
قال الرسول: (صلوا عليه)
لو شفتم العبد المطيع
دوما يداوم ع الصلاه
فلتشهدوا له بالإيمان
هى بصراحه المنتهى
هى اللى تنهيك عن فساد
عن منكرات 00 عن أي فحشاء أو مراء
هى اللى ربطاك بالسماء
عاوز أقول 00 نفسي أقول
بس المسائل مش قواله وجعجعه
لازم نكون م العاملين العاشقين المعمعه
علشان نكون
خلف الرسول (صلوا عليه)
صحبه معه
..........
ناصر صلاح
أغسطس 2004