" و إذا الوحوش حشرت "
علشان تمزق جتتك
و انتي اللي ماقدرش الزمن
يكسر ف قلبك عزتك
متمددة جوه الكفن
بتنزي حلم الأمنيات
متجمعين كل العسس
كاشفين مفاتن عورتك
فضوا بكارة ثورتك
و الدم سال ..........
طرطش على جسم الصبي
ابنك نبي
و عشان كده
ملهوش كرامة فوق حدود
قدسيتك
ماحناش ف زمن الأنبيا و المعجزات
يا اللي صراخك ف المدى
أصبح سكات
إتهيئي للحظة حساب
إتهيئي للحظة حساب
ذنبك كبيييييييير
أبعد قوي عن صولجان المغفرة
دول قالوا عنك سافرة
يا كاشفة شعرك و الجدايل
قمح متزوق عنب
و الصدر نافر أهرامات
و الرمش فارد ع السواحل
و الرمش فارد ع السواحل
و الشطوط لولي و دهب
يا أم الخطاوي دوخت
قلب الحضارة من التعب
صوتك تقاسيم الكمنجة
لو يبوسها القوس بتغريدة خجل
ترقص فروع الورد
و طيور الأمل
ليه جف غصنك
و انتي في عز الربيع ؟
رافضة الركوع
و مسيلمة
واقف بيدبح ف الجميع
يا أم الندا
عمره ما كان يعرف يخاف
حلمك كابوس
تفسيره
جايه سنين عجاف
فـ خلاص بقي
يا تدب فيكي الروح و تحصل معجزة
يا نموت هناك
متعلقين ع المشنقة
و بصوت ضعيف
لابس قناع الحكمة على توب الأمل
و كإنه سقراط الحكيم
و بكلمته هايجر شمس المستحيل
من ودنها
علشان ينور أرض طلعت م المدار
بتلف حوالين نفسها
جمع حروف عريانة
و ف عز الشتا
مكشوفة العورة
مباحة للسان
" الصورة مش بالشكل ده
نص القزازة فاضي
و التاني ملان "
لكنها لما عيونها ركزت
إتأكدت ......
إن القزازة نصها
كان دم ممزوج بالألم
و إن الأمل كان حلم مولود
م العدم
و عشان كده
لمت حروفها الميته
و اتكفنوا الاتنين
بألوان العلم
..........
سميرة جمال الدين