وشدى الحيل يا أوجاعــــى
وإياكى وكلمة أه
وإوعاكى من الشكــــــــوى
ومد الإيد لغير الله
ألامك فيكى صُرٍيهــــــــــا
وشدى الحبل ع الأخر
وخلى رجاكى بمدد العيــــن
مفيش أول مالوش اخر
صحيح الشيلة مش سهلــــة
لكن اليأس مر وويل
ولو سلمنا للأحـــــــــــــزان
فلا يمكن يعدى الليل
فشدى الحيل يا أوجاعــــــى
وداوى الجرح بالتسبيـــح
وعدى فوق جسور الهـــــــم
دا ياما راح نقابل ريــــح
فوضى القلب بالإيمان
وحنى النية بالتوبـــــــــــــة
وثورى ع الوجع باللين
بلاش تعيشيها مغصوبـــــة
ما دامت فينا أنفاسنـــــا
فليه نهجر دروب الــــروح
وليه نشحت حنان الخلق
وباب رب العباد مفتــــــوح
وجع الأبدان صحيح محنة
لكنه منحة م البارى
فيا بخت اللى ربه حباه
وكان لجراحه بيدارى
واهى أيام بطول وبعرض هتعدى
ولازم فيها نتحمل
نعافر مهما فيها نشــــــــــوف
لأخر دقة ونكمل
مفيش قدامنا غير الصبـــــــر
نداوى بمره أوجاعنا
ونتعكز على الأيــــــــــــام
عسى الأحزان تودعنا
فشدى الحيل يا أوجاعــــــى
وقومى بينا لاجل نعيش
مفيش ميت تضمه حيــــــاه
ولا فى حى مناه ما يعيش
لكن هىً علل وأسبـــــــــاب
وسوء للفهم مش أكتــر
كتير م الناس بتستسلـــــــــم
وناس عايشاها وبتكًبــر
طباع وعقول نفوس واسرار
وكون فاتح دراعاته
فياللا نعيشه كيف ما يكون
ونتقوى بدقاته
.............
محمود وحيد