إياك يا واد تطلع غبي
أو تمشي يوم على مذهبي
أو تبقي طيب زي أبوك
و تسيب سنينك يسحبوك
كل البشر راح يركبوك
ملعونة طيبة جد أبوك
أهو مات و غار
عاش محني خدام للكبار
كان حلمه يطلع يوم نهار
كان نفسه بس عيال و دار
أهو عاش حمار
و أهو مات حمار
و الدنيا تربيزة قمار
الدنيا يا إبني كاس فـ بار
فـ إزاي هتلبس توب نبي ؟
إياك يا واد تطلع غبي
حوش يا واد و إجمع قروش
كل البشر لابسين وشوش
هيدوسوا فيك و لا يرحموش
يا تبقي وحش من الوحوش
يا تقول يا دمعة قربي
إياك يا واد تطلع غبي
إياك يا واد تزرع شجر
إهبش و كون زي الغجر
و إلعب بـ 100 بيضة و حجر
و إياك تعيش علي ملعبي
إياك يا واد تطلع غبي
إياك يا واد تطلع ضعيف
لأجل أما تلقي فـ يوم رغيف
خليك قوي و الكلمة سيف
إياك تكون ع الدنيا ضيف
راح يرموا قلبك ع الرصيف
و تقول يا دنيا طبطبي
إياك يا واد تطلع غبي
إياك يا واد تطلع حبيب
حقك خده من بق ديب
و إياك تحن إياك تسيب
لتعيش غريب و تموت غريب
خليك أسد و إياك تخيب
و لما توصل للمشيب
إياك تعيش دور الصبي
إياك يا واد تطلع غبي
إياك يا واد تطلع ملاك
لازم تكون بركان هلاك
إياك تحس بالأرتباك
و بكلمة فض الأشتباك
بين أي شامي و مغربي
إياك يا واد تطلع غبي
إياك يكون عندك ضمير
و ديما إمشي عكس سير
إياك تقول الصلح خير
إياك تكون فـ الدنيا طير
حقق يا واد بقي مطلبي
إياك يا واد تطلع غبي
لكن يا واد إعشق وطن
تموت فـ حبه و تندفن
الأرض ما يصيبهاش عفن
جهز لنفسك 100 كفن
و إياك تأمن أجنبي
إياك يا واد تطلع غبي
إياك يا واد تطلع غبي
إياك يا واد تطلع غبي
...................
بقلم .. مصطفي تيسير