تعرف امتى بيبكى الشاعر.... ؟!
لمَّا يشوف ع الغصن جفاف
ولاَّ عيون فى الضى تخاف
أو انسان بيدارى العوزة
كل طموحه اللقمة الحاف
كل طموحه يجيب كرتونة
تبقى ف عز البرد لحاف
لمَّا يشوف الدمعة
ف وش يتيم
تسيل ع الخد
-
تعرف امتى بيبكى الشاعر.... ؟!
لمَّا الالوان تبقى مزيج
ولاَّ القطه لمَّا يعاكس حد ولادها
تجرى عليه تصرخ وتهيج
لمَّا يلاقى الحلم بتاعه
باعه
بعيد
والايد مش قادرة إليه تتمد
وكل ما يرجع يحلم تانى
يلاقى طريق الحلم اتسد
-
تعرف امتى بيبكى الشاعر.... ؟!
لمَّا المطره تهاجر غيطه
ولاَّ الريح بتهزهز حيطه
لمَّا يلاقى غدر حبيبه
ولا المعنى يتوه ويسيبه
بعد ما حبل العشق اتشد
-
تعرف امتى بيبكى الشاعر.... ؟!
لمَّا يشوف الضحكة مخيفه
ولاَّ المعنى ف بطن الشاعر
يبقى مجرد كلمة سخيفة
تاهت جوا عيون الضلمة
ف وقت الجد
-
تعرف امتى بيبكى الشاعر.... ؟!
لمَّا يشوف عيون حيرانه
حاسه بغربة
حتى النجم بقاش ونَّاس
رغم الزحمة
وكتر الناس
فاقت كل حدود العد
-
تعرف امتى بيبكى الشاعر.... ؟!
لمَّا البحر قصيده يجف
والتفعيلة تدور وتلف
لمَّا البدر يخاصم ليله
لمَّا يتقل حمله وشيله
ولا الحمل يزيد عن كيله
رغم ثباته
ونصبة عوده
رغم صموده
ف لحظة ضعف
بشكل مفاجئ
زى الصخر يا ناس يتهد
تعرف امتى بيبكى الشاعر.... ؟!
.............
راضي علي الطهطاوي