وكل ما أقول أهى بانت
خلاص هانت
يادوب تكة وراح تفرج
ألاقى سكتى خانت
وصعبت بعد ما لانت
ومش لاقى لها مخرج
أقول يا رب عدلها
وصالحنى على الأيام
بقالى سنين بحايلها
وامدلها إيديا سلام
تطنشنى أسب لها
وتهجرني أحن لها
ولما ترق أسألها
ح تديني السعادة بكام ؟
تاخدنى لبحرها وليلها
تقولي عوم مدام عوام
لحد الصبح توصلها
نهاية الرحلة أهي قدام
واقول لنفسى ح اعملها
شوية عوم واعدى لها
يا رب عليا سهلها
دى ليلة وكله يبقى تمام
فتيجى موجة ترزعني
وتخسفني و ترفعنى
وتحدفني ترجعنى
أعود تاني لأولها
وصوت ينده وانا مكروب
ح تبدأ تاني يا مغلوب
تعدى إزاى ؟
ولسة فيه على ضهرك
عيوب وذنوب
غبى ونساى
عشان توصل مكان راحتك
لا بد تتوب
لابد تقاسي وتعانى
أقول تانى؟؟
ما عادش خلاص فى إمكانى
ماهو إنت يا رب رب قلوب
مانيش قادر أكون أيوب
ولا صابر على المكتوب
مشيت طول الطريق معصوب
ومش بإرادتى لأ مغصوب
واتارينى
مشيت السكة بالمقلوب
.......
هشام الدشناوى
شاعريةٌ ولا أروع
ردحذف